Loading Time...
న్యూస్ ఈ-పేపర్ Live TV
Mobile Logo
Loading...
EPAPER ఆంధ్రప్రదేశ్ తెలంగాణ జాతీయం సినిమా క్రీడలు బిజినెస్ క్రైమ్ భక్తి Live TV రాశిఫలాలు
ఈ రోజు మీ ప్రాంతం LIVE
మెనూ (MENU)

పెద్దగట్టు లింగమంతుల స్వామి జాతరకు ముహూర్తం ఖరారు

Author
Posted By Praja Nestham Jwala News
| 17 Nov 2026, 07:50 AM |
పెద్దగట్టు లింగమంతుల స్వామి జాతరకు ముహూర్తం ఖరారు

సూర్యాపేట, నవంబర్ 16 (ప్రజానేస్తం జ్వాల): తెలంగాణలో ప్రసిద్ధి చెందిన సూర్యాపేట జిల్లా దురాజ్‌పల్లి పెద్దగట్టు శ్రీశ్రీ లింగమంతుల స్వామి జాతర నిర్వహణకు ముహూర్తం ఖరారైంది. 2027 ఫిబ్రవరి 21 నుంచి 25వ తేదీ వరకు ఐదు రోజుల పాటు జాతర ఉత్సవాలను వైభవంగా నిర్వహించనున్నారు. ఈ మేరకు జాతర కార్యక్రమాల వివరాలను దేవస్థానం పూర్వ చైర్మన్ మద్ది శ్రీనివాస్ యాదవ్ వెల్లడించారు. జాతరలో భాగంగా ఫిబ్రవరి 21న కేసారం గ్రామం నుంచి దేవరపెట్టెను పెద్దగట్టుపైకి తీసుకురావడంతో పాటు గంపల ప్రదర్శన నిర్వహించనున్నారు. ఫిబ్రవరి 22న స్వామివారికి బోనాలు సమర్పిస్తారు. ఫిబ్రవరి 23న చందపట్నం వేయడం, ఫిబ్రవరి 24న నెలవారం నిర్వహించి దేవరపెట్టెను తిరిగి కేసారం గ్రామానికి తరలించనున్నారు. ఫిబ్రవరి 25న జాతర ముగింపు కార్యక్రమాలు చేపట్టనున్నారు.

జాతర ఉత్సవాలకు ముందస్తు కార్యక్రమాల్లో భాగంగా ఫిబ్రవరి 6వ తేదీన చీకటాయిపాలెం నుంచి దేవరపెట్టెను తరలించనున్నారు. ఫిబ్రవరి 7వ తేదీ ఆదివారం రాత్రి 11 గంటలకు దిష్టి పూజ నిర్వహించనున్నట్లు మద్ది శ్రీనివాస్ యాదవ్ తెలిపారు. ప్రతి రెండేళ్లకోసారి నిర్వహించే ఈ పెద్దగట్టు జాతరకు తెలంగాణతో పాటు ఆంధ్రప్రదేశ్‌లోని పలు ప్రాంతాల నుంచి లక్షలాది మంది భక్తులు తరలివచ్చి లింగమంతుల స్వామివారిని దర్శించుకుంటారు. జాతర సందర్భంగా భక్తులకు ఎలాంటి ఇబ్బందులు కలగకుండా ఉత్సవాలను విజయవంతంగా నిర్వహించేందుకు భక్తులు, ప్రజలు సహకరించాలని నిర్వాహకులు కోరుతున్నారు.