🏠 prajanesthamjwalanews.com
Watermark
Clip Header Logo
Date of Publish : 11 November 2026, 7:01 pm Posted by : Praja Nestham Jwala News

టిప్పర్ ఢీకొని వివాహిత దుర్మరణం

News Image

భర్త కళ్ల ముందే ఘోర ప్రమాదం.. ఇద్దరు కుమారులకు తీరని విషాదం

నేరేడుచర్ల (ప్రజానేస్తం జ్వాల): అతివేగంగా వచ్చిన టిప్పర్ ద్విచక్ర వాహనాన్ని ఢీకొట్టడంతో ఓ వివాహిత అక్కడికక్కడే మృతి చెందిన విషాద ఘటన నేరేడుచర్ల వద్ద చోటుచేసుకుంది. భర్త కళ్ల ముందే భార్య ప్రాణాలు కోల్పోవడంతో కుటుంబంలో తీవ్ర విషాదం నెలకొంది. వివరాల్లోకి వెళితే.. ఖమ్మం జిల్లా నాగులవంచ గ్రామానికి చెందిన బొమ్మిని సూరమ్మ (40), తన భర్త వెంకన్నతో కలిసి చిలక జ్యోతిష్యం చెబుతూ జీవనం సాగిస్తున్నారు. ఈ క్రమంలో మిర్యాలగూడ నుంచి హుజూర్‌నగర్‌కు ద్విచక్ర వాహనంపై ప్రయాణిస్తుండగా నేరేడుచర్ల వద్ద వేగంగా వచ్చిన టిప్పర్ వారి వాహనాన్ని బలంగా ఢీకొట్టింది. ఈ ప్రమాదంలో సూరమ్మ తీవ్ర గాయాలతో అక్కడికక్కడే మృతి చెందింది.

తన కళ్ల ముందే భార్య ప్రాణాలు కోల్పోవడంతో భర్త వెంకన్న కన్నీరుమున్నీరయ్యారు. టిప్పర్ డ్రైవర్ అతివేగం, నిర్లక్ష్యంగా వాహనం నడపడం వల్లే ప్రమాదం జరిగిందని ఆరోపిస్తూ పోలీసులకు ఫిర్యాదు చేశారు. మృతురాలికి భర్తతో పాటు ఇద్దరు కుమారులు ఉన్నారు. ఈ ఘటనపై కేసు నమోదు చేసి దర్యాప్తు చేస్తున్నట్లు నేరేడుచర్ల ఎస్ఐ సీహెచ్. గోపాల్ రెడ్డి తెలిపారు. ప్రమాదానికి కారణమైన టిప్పర్ డ్రైవర్ పరారీలో ఉన్నట్లు సమాచారం.
🏠 Home