నేరేడుచర్లలో మహిళలకు ఉచిత వైద్య శిబిరం
24 మంది మహిళలకు వైద్య పరీక్షలు.. ఆరోగ్య పరిరక్షణపై అవగాహన
నేరేడుచర్ల, నవంబర్ 4 (ప్రజానేస్తం జ్వాల): మహిళల ఆరోగ్య పరిరక్షణ, వ్యాధుల నివారణపై అవగాహన కల్పించే లక్ష్యంతో మహిత స్వచ్ఛంద సంస్థ ఆధ్వర్యంలో, ఎస్బీఐ ఫౌండేషన్ సౌజన్యంతో, లైఫ్ సీబీఓ సహకారంతో సూర్యాపేట జిల్లా నేరేడుచర్లలోని రామ్నగర్లో ఉచిత వైద్య శిబిరం నిర్వహించారు. ఈ శిబిరంలో మొత్తం 24 మంది మహిళలు పాల్గొనగా, వారికి ఉచితంగా వైద్య పరీక్షలు నిర్వహించి ఆరోగ్యానికి సంబంధించిన పలు సూచనలు, సలహాలు అందించారు.
శిబిరంలో మహిళల ఆరోగ్య పరిస్థితులను వైద్య సిబ్బంది పరిశీలించి, సాధారణ ఆరోగ్య సమస్యలు, వ్యాధుల పట్ల తీసుకోవాల్సిన జాగ్రత్తలు, వ్యక్తిగత పరిశుభ్రత, ఆరోగ్యకరమైన జీవన విధానంపై అవగాహన కల్పించారు. అనారోగ్య లక్షణాలు కనిపించినప్పుడు నిర్లక్ష్యం చేయకుండా సకాలంలో వైద్యులను సంప్రదించాలని సూచించారు. క్రమం తప్పకుండా ఆరోగ్య పరీక్షలు చేయించుకోవడం ద్వారా అనేక వ్యాధులను ప్రారంభ దశలోనే గుర్తించి తగిన చికిత్స పొందవచ్చని వివరించారు.
ఈ కార్యక్రమానికి మున్సిపల్ కౌన్సిలర్ ఎంజమూరి వెంకటమ్మ ముఖ్య అతిథిగా హాజరై వైద్య శిబిరాన్ని ప్రారంభించారు. ఈ సందర్భంగా ఆమె మాట్లాడుతూ మహిళల ఆరోగ్య పరిరక్షణకు ఇటువంటి ఉచిత వైద్య శిబిరాలు ఉపయోగకరంగా ఉంటాయని తెలిపారు. మహిళలు తమ ఆరోగ్యంపై ప్రత్యేక శ్రద్ధ చూపాలని, కుటుంబ బాధ్యతలతోపాటు వ్యక్తిగత ఆరోగ్యానికి కూడా ప్రాధాన్యత ఇవ్వాలని సూచించారు. మహిత స్వచ్ఛంద సంస్థ చేపడుతున్న ఆరోగ్య సేవా కార్యక్రమాలను అభినందించారు.
ఈ కార్యక్రమంలో మెడికల్ ఆఫీసర్ డాక్టర్ రోహిణి, జిల్లా కోఆర్డినేటర్ సయ్యద్ సజ్జాద్ అలీ, వైద్య సిబ్బంది, సంస్థ ప్రతినిధులు, స్థానిక ప్రజాప్రతినిధులు పాల్గొన్నారు.