కాకతీయ విశ్వవిద్యాలయంలో టమాటా పంట అభివృద్ధిలో ట్రాన్స్జీన్ సాంకేతికతపై పుస్తకావిష్కరణ
కాకతీయ విశ్వ విద్యాలయం (ప్రజానేస్తం జ్వాల): వ్యవసాయ రంగంలో ఆధునిక జీవసాంకేతిక పరిజ్ఞానం ప్రాధాన్యాన్ని చాటిచెబుతూ, “Transgene Technology for Improvement of Cultivated Tomato” పేరుతో డాక్టర్ జి. విక్రమ్ రచించిన పుస్తకం కాకతీయ విశ్వవిద్యాలయంలో ఆవిష్కరించబడింది. విశ్వవిద్యాలయ వైస్ఛాన్సలర్ చేతుల మీదుగా, ఆయన ఛాంబర్లో జరిగిన ఈ కార్యక్రమంలో విశ్వవిద్యాలయ పరిపాలనా అధికారులు పాల్గొన్నారు. టమాటా పంట అభివృద్ధికి ట్రాన్స్జీన్ సాంకేతికత ఎలా దోహదపడగలదనే అంశాన్ని ప్రధానంగా తీసుకొని రూపొందించిన ఈ పుస్తకం వ్యవసాయ శాస్త్రం, జీవసాంకేతిక పరిశోధనలపై ఆసక్తి ఉన్నవారికి ఉపయోగకరమైన గ్రంథంగా నిలవనుంది. ఈ సందర్భంగా రచయిత డాక్టర్ జి. విక్రమ్ తన విద్యా, పరిశోధనా ప్రయాణంలో మార్గదర్శకత్వం, ప్రోత్సాహం, స్ఫూర్తిని అందించిన తన గురువు ప్రొఫెసర్ ఎన్. రామస్వామికి ప్రత్యేక కృతజ్ఞతలు తెలిపారు. పుస్తక రచనలో సహకారం అందించిన సహరచయిత డాక్టర్ రజనీకాంత్కు ధన్యవాదాలు తెలియజేశారు. అలాగే, తన కృషిని నిరంతరం ప్రోత్సహించిన వాగ్దేవి డిగ్రీ అండ్ పీజీ కళాశాల యాజమాన్యం, ప్రిన్సిపాల్, వైస్ ప్రిన్సిపాల్, ఐక్యూఏసీ కోఆర్డినేటర్, స్టాఫ్ సెక్రటరీ, వివిధ విభాగాల అధిపతులకు కృతజ్ఞతలు తెలిపారు. తన సహచర అధ్యాపకులు, మిత్రులు, విద్యార్థులు అందించిన ప్రోత్సాహం ఈ విజయానికి ఎంతో తోడ్పడిందని పేర్కొన్నారు. పరిశోధనాత్మక రచనలతో శాస్త్రీయ విజ్ఞానాన్ని విస్తరించే దిశగా డాక్టర్ జి. విక్రమ్ చేసిన ఈ కృషి విద్యా, పరిశోధనా రంగాల్లో ప్రాధాన్యత సంతరించుకుంది.